Yangiliklar

 Ўзбекистон Бадиий академияси Марказий кўргазмалар залида Республика байналмилал маданият маркази (РБММ) ташкил этилганининг 20 йиллигига бағишланган “Ватан равнақи – кўп миллатли халқ меҳнати маҳсули” деб номланган кўргазма очилди.
 Тадбирда сўзга чиққан РБММ директори Н.Муҳаммадиев, “Тасвирий ойина» ижодий уюшмаси раиси И.Латипов ва бошқалар мамлакатимизда Президентимиз раҳнамолигида изчил амалга оширилаётган ислоҳотлар, Ватанимизнинг халқаро миқёсдаги нуфузини янада юксалтириш йўлида олиб борилаётган эзгу ишларда юртимизда истиқомат қилаётган турли миллат ва элатларнинг аҳиллик билан умргузаронлик қилаётгани муҳим аҳамият касб этаётганини алоҳида таъкидладилар.
 Бу ерда намойиш этилаётган бадиий, фотоасарлар, амалий санъат намуналарида мустақиллик йилларида Ватанимизда турли соҳаларда эришилган улкан ютуқлар, бунёдкорлик ишлари, милолатлараро ҳамжиҳатлик, тинч ва осуда ҳаётимизнинг бетакрор лавҳалари ўз аксини топган.
 – Иштирокчилар турли миллат вакиллари бўлсада, уларнинг асарларида ўзи туғилиб ўсган гўша – Ўзбекистон аталмиш жаннатмонанд юртга бўлган улкан меҳрни ҳис қиласан киши, – дейди кўргазма иштирокчиси, рассом Искра Шин. – Намойишга қўйилган ҳар бир асарни она-Ватанга бағишлов, дейиш мумкин.
 Кўргазманинг очилиш маросимида Ўзбекистон Республикаси Бош вазирининг ўринбосари Э.Боситхонова сўзга чиқди.

Суннат Астанов,
“Халқ сўзи”, 21.01.2012 й.