Yangiliklar

Республика байналмилал маданият маркази, Ўзбекистон Республикаси Фанлар академияси, Ўзбекистон Республикаси Президенти ҳузуридаги Давлат ва жамият қурилиши академияси ва Ўзбекистон Республикаси Вазирлар маҳкамаси ҳузуридаги дин ишлари бўйича қўмита ҳамкорликда «Ўзбекистон мустақиллиги – миллатлараро муносабатлар ривожида янги давр» мавзуида республика илмий-амалий конференциясини ўтказди. Конференция Республика байналмилал маданият марказининг 20-йиллигига бағишланган. Конференция Ўзбекистон Республикаси Фанлар академияси мажлислар залида 2012 йил 19 январь куни бўлиб ўтди.
Конференцияни Ўзбекистон Республикаси Фанлар академияси президенти Ш.И. Салихов кириш сўзи билан очди. У ўз сўзида РБММни 20-йиллик фаолияти билан табриклаб, РБММ, миллий маданий марказлар ҳамда конференция ишига муваффақиятлар тилади. Шунингдек, Ўзбекистон Республикасининг Инсон ҳуқуқлари бўйича миллий маркази директори, Ўзбекистон Республикаси Олий Мажлиси Қонунчилик палатаси Қўмита раиси А.Х.Саидов конференция иштирокчиларига ижодий ютуқлар тилаган ҳолда Ўзбекистон мустақилликка эришгандан сўнг миллатлараро муносабатлар ва диний бағрикенглик ривожида эришган ютуқларига эътибор қаратди.
Конференциянинг асосий маърузалари ва уларнинг муҳакамаси борасида Ўзбекистон Республикаси Фанлар академияси вице-президенти, тарих фанлари доктори, профессор Б.А.Абдуҳалимов модераторлик қилди.
Республика байналмилал маданият маркази директори Н.М.Муҳаммадиев “Миллатлараро тотувликни мустаҳкамлаш йўлида 20 йил” мавзусидаги маърузасида давлатимиз ва Республика байналмилал маданият маркази, мамлакатимиздаги 140 дан ортиқ миллий маданий марказларнинг 20 йил давомида миллатлараро тотувликни шакллантириш борасида амалга оширган ишларининг асосий натижалари, келажакдаги масалалар ва режалар ҳақида тўхталди. Сўнг у «Мустақил Ўзбекистонда миллатлараро муносабатлар ривожи. Развитие межнациональных отношений в независимом Узбекистане» (Тошкент: Ўзбекистон, 2012. 408 бет. 25,5 б.т.) китобини кенг жамоатчиликка тақдим қилди.
Мазкур конференциянинг шиори қилиб, Ўзбекистон Президенти Ислом Каримовнинг қуйидаги сўзлари олинди: “Ўзбекистоннинг бойликлари кўп, лекин бизнинг энг катта бойлигимиз, энг юксак қадриятимиз – жамиятимизда ҳукм сураётган тинчлик, миллатлараро дўстлик ва ҳамкорликдир”. Конференция ва презентацияси ўтказилган китоб ушбу юксак қадриятни асраб авайлашга ҳизмат қилади.
Конференцияда сўзга чиққанлар Ўзбекистоннинг миллатлараро муносабатлар соҳасида амалга ошираётган сиёсати ва бу борадаги тажрибаси бошқа кўпмиллатли давлатлар учун намуна бўлиши мумкинлигини таъкидладилар. Бунда республика раҳбарияти томонидан нафақат Ўзбекистонда, балки бутун Ўрта Осиёда барқарорлик ва тараққиётга муайян ҳисса қўшаётган миллий маданий марказлар фаолияти учун яратиб берилаётган шарт-шароитлар муҳим аҳамият касб этаётгани алоҳида қайд этилди.
 Анжуманда намойиш этилган “Ягона оилада” фильми йиғилиш иштирокчиларида катта таассурот қолдирди.
Конференцияда Ўзбекистон Республикаси Президенти Давлат маслаҳатчисининг ўринбосари М.М.Аҳмаджонов, Ўзбекистон Республикаси Бош вазирининг ўринбосари Э.Э.Боситханова иштирок этдилар.